Fjölskyldu- og félagssvið Vestmannaeyjabæjar Vestmannaeyjum, 18. apríl 2011





Helgafellsvöllur,
aðstaða fyrir leikmenn og dómara

Knattspyrnufélagið Framherjar Smástund; K. F. S., mun í ár spila enn eitt sumarið í 3. deild karla. Margt gott er að segja um þennan völl, en sl. ár hafa engir búningsklefar fundist við völlinn. Ekki vitum við hvernig stendur á því, en ef meiningin er að lappa ekki frekar upp á það, væri gott að vita hvar við eigum þá að spila okkar heimaleiki, því að í reglugerðum KSÍ segir m.a.:

Grein 3 – Flokkun leikvanga
3.1 Leikvöngum á Íslandi er skipt í 5 flokka, A, B, C, D og E, eftir stærð, yfirborði, umgjörð, aðbúnaði, áhorfendaaðstöðu og tæknilegum búnaði.
3.2 Almennt ná flokkar A, B og C yfir velli, sem notaðir eru til keppni í efri deildum Íslandsmóts meistaraflokks og síðari umferðum bikarkeppninnar, flokkur D nær yfir velli í fullri stærð sem notaðir eru til keppni í neðri deildum Íslandsmóts meistaraflokks og yngri flokkum, en flokkur E yfir velli sem notaðir eru til keppni í 7 manna liðum, sbr. reglugerð KSÍ um knattspyrnumót, kafla 4.
Síðar:
Grein 14 – Búningsaðstaða
14.1 Miða skal við að búningsherbergi (fyrir heima- og gestalið) séu a.m.k. 20 m2 auk sturtuklefa og snyrtingar. Þau skulu vera upphituð og læsanleg og nærri leikvelli.
14.2 Búningsherbergi dómara skulu vera aðskilin frá búningsherbergjum keppnisliða, upphituð og læsanleg.
14.3 Taka þarf tillit til þess að leikir geta verið dæmdir af kvendómurum og/eða kvenaðstoðar-dómurum eða verið milli kynblandaðra liða. Vel útbúinn leikvangur sér báðum kynjum fyrir sambærilegri búningsaðstöðu.
14.4 Flokkar A, B og C:
Aðskilin búningsherbergi skulu vera á öllum leikvöngum. Þá skal og vera í þeim búnaður, sem dómari getur notað til þess að gefa liðum merki við upphaf hvors leikhluta.
- Búningsherbergi skal hafa rúmgóða búningsaðstöðu, fatahengi eða skápa fyrir a.m.k. 25 manns, og vera með sætispláss fyrir alla. Heppileg lausn er t.d. samnýting tveggja minni búningsklefa sitt hvoru megin við sturtuklefa, fyrir hvort lið.
- Innangengt skal vera á salerni úr búningsherbergi.
- Sturtuklefar skulu vera með a.m.k. fimm sturtuhausa, og tengdir búningsherbergjum.
- Þá skal gera ráð fyrir plássi fyrir nuddaðstöðu og töflu fyrir þjálfara.

Búningsherbergi dómara skal vera nærri búningsherbergjum liða. Auk rúmgóðs fatahengis fyrir 5 manns, skal búningsherbergið hafa vatnssalerni og sturtuklefa, auk útbúnaðar til þess að kalla leikmenn til leiks. Það skal búið 5 stólum og borði svo að dómararar geti sinnt skýrslustörfum.
Gangar og herbergi í búningsaðstöðu skulu vera með skýrum og auðskildum merkingum sem beina aðkomuliðum, dómurum, starfsmönnum til herbergja, o.s.frv.
Æskilegt er að búningsklefar séu í sama stúkuhluta og heiðursstúka, fjölmiðlaaðstaða og stjórnunarskrifstofur þar sem því verður við komið.
14.5 Flokkar D og E:
Hér er ekki gerð krafa um aðskilin búningsherbergi nema í leikjum í meistaraflokki. Salerni skal vera í námunda við búningsherbergi, ef ekki er innangengt í það.
14.6 Búningsherbergi skulu þannig staðsett að sem styst leið sé frá þeim að leikvelli. Leið leikmanna og starfsmanna leiks skal lögð sléttu og mjúku undirlagi en þó ekki hálu (t.d. teppi, gúmmídúk eða svipuðu), og vera lokuð almenningi og starfsmönnum fjölmiðla. Þessu skal framfylgt þannig að tryggt sé að áhorfendur geti ekki veist að þeim (skýli, girðing, gæslulið). Sömuleiðis skal öryggi þeirra tryggt við komu og brottför frá leikvangi. KSÍ setur kröfur um gæslu við leið leikmanna og starfsmanna að og frá leikvelli eftir því sem ástæða er til.

Hef undirstrikað það, sem á við okkur. Við þurfum að gefa upp ákveðinn heimavöll og gáfum upp Helgafellsvöll þetta árið eins og venjulega. Andstæðingar okkar hafa margir kvartað sl. ár, við höfum klætt okkur úr í Íþróttamiðstöðinni og síðan komið okkur upp eftir, en það hefur vafist fyrir andstæðingunum. Verst er þó að haf ekkert afdrep í hálfleik í vondu veðri. Stingum upp á ódýrum skúrum, sem héldu a.m.k. vatni og vindum, það yrði strax mikil framför, man ekki eftir miklum kvörtunum meðan gömlu skúrarnir voru.
Með von um skjót svör, tímabilið fer jú að hefjast og við þurfum a.m.k. að geta útskýrt núverandi aðstæður fyrir KSÍ og andstæðingum okkar. Minni í lokin á, að við sátum nýverið fund með forsvarsmönnum mfl. karla í fótbolta hjá ÍBV um enn aukið samstarf ÍBV og okkar í leikmannamálum, þar bar þetta á góma, að geta boðið mönnum upp á mannsæmandi aðstöðu. Við æfum jú líka þarna allt sumarið, ásamt fleirum.

Virðingarfyllst,

Hjalti Kristjánsson, þjálfari, framkvæmdastjóri, læknir og getraunastjóri KFS